திங்கள், 24 ஆகஸ்ட், 2015

பொள்ளாச்சி இலக்கியவட்டத்தின் இருபத்தி எட்டாவது சந்திப்பு

பொள்ளாச்சி இலக்கிய வட்டத்தின் இருபத்தி எட்டாவது இலக்கிய சந்திப்பு 16.08.2015 அன்று பாலக்காடு சாலை நகராட்சி ஆண்கள் மேல்நிலைப்பள்ளியில் நடந்தது.

காலையில் வழக்கத்தினும் நேரமாகக் கிளம்பி வழக்கத்தினும் வழக்கமான நேரத்துக்கு அரங்கம் வந்து இருக்கைகளைச் சுத்தம் செய்து தயாராகும் போது இன்றைய நிகழ்ச்சிகளின் திட்ட வடிவமைப்பு மனக்கண்ணில் ஓடியது.
மூன்று கவிதைத் தொகுப்புகள் அறிமுகம். செந்தில்பாலாவும், இராகுலனும், நறுமுகை ஜெரா மூவரும் நள்ளிரவிலேயே வந்து விட்டார்கள். சோலைமாயவன் அவர்களை அறையில் தங்க வைத்து விட்டார். காலையில் தயாராகி வந்துவிட்டார்கள்.

நிகழ்ச்சிக்காக தேனியிலிருந்து அறிவழகன், அகமது, விஜயராஜ் காந்தி வழக்கம்போல வந்துவிட்டார்கள். கோவை பேரூருக்கு பக்கமிருந்து ஹரிதா, ஈரோட்டிலிருந்து கார்த்திகா, இரவுப் பணியையும் முடித்துவிட்டு இலக்கியன் விவேக் என அத்தனை பேரும் தூரத்திலிருந்தெல்லாம் வந்திருந்தது மனதை நெகிழச் செய்தது.

பத்து மணி ஆனதும் படித்ததில் பிடித்தது ஆரம்பமானது. நல்ல கவிதைகளை, கதைகளை வாசகர்கள் பகிர்ந்து கொண்டனர். சற்று நேரத்தில் கனல்மதியும் வந்து விட நிகழ்ச்சி துவங்கியது.

கவிஞர் இரா.பூபாலன் வரவேற்றுப் பேசினார். கவிஞர் இரா.இராகுலன் எழுதிய கடவுளின் கடவுள் எனும் கவிதை நூலை கவிஞர் அம்சப்ரியா அறிமுகம் செய்து பேசினார்.










இராகுலனின் தொகுப்பு முதல் தொகுப்பைப் போல அல்லாமல் செறிவான கவிதைகளுடன் சிறப்பாக வந்துள்ளன. தமிழ்க் கவிதைச் சூழலில் இராகுலனுக்கு நல்ல எதிர்காலம் உண்டு என்று சொன்னார்.
எட்டாம் வகுப்பு மாணவி கனல்மதி எழுதி வெளியிட்ட இப்படிக்கு மழை எனும் கவிதைத் தொகுப்பை நான் அறிமுகம் செய்து பேசினேன்.

கவிதைகளின் மீதான நமது ஈர்ப்பு எப்போது வருகிறது என்றால், நாம் குழந்தையாக இருக்கும் போதே துவங்கி விடுகிறது . அம்மாவின் தாலாட்டு அற்புதமான கவிதையல்லவா. அதனால் தானே தூங்குகிறோம், அதில் தானே மயங்கி உண்கிறோம். தாலாட்டில் தொடங்கும் நமது கவிதை ஸ்பரிசம் ஒப்பாரியில் முடியும் வரை கவிதை நம்மோடு பயணித்துக் கொண்டே தான் இருக்கிறது வாழ்க்கை முழுவதும்.
நாம் தான் பல நேரங்களில் பல சூழல்களில் கவிதைகளை விட்டு வெகு தூரம் விலகி வந்து விடுகிறோம். பள்ளி நாட்களிலேயே பலருக்கு கவிதைகளின் பால் ஈர்ப்பு வருவது இயல்பு. காரணம் நமது செய்யுள் பகுதிகளும், பாரதியும், பாரதிதாசனும் நம்முள் ஏற்படுத்தும் பாதிப்பினால் வருவது. பள்ளி , கல்லூரி நாட்களில் கவிதை மற்றும் இலக்கிய ஈடுபாடுகளில் தீவிரமாக இருப்பவர்களுக்கு வேறு எந்த போதையும் ஏற்பட்டுவிடாது என்னும் நல்ல விசயத்தையும் நாம் கூர்ந்து கவனிக்க வேண்டும். ஆகவே தான் வாசிப்புப் பழக்கத்தையும், இலக்கியப்பரிச்சயமும் சிறு வயதிலிருந்தே கொண்டு வர வேண்டும் என்கிறோம். பள்ளி நாட்களிலேயே கவிதை எழுதுவதும் பிற்பாடு அதை முறைப்படுத்தத் தெரியாமல், நெறிப்படுத்த ஆளில்லாமல் விட்டுவிடுவதும் நம்மில் பலருக்கு வாய்த்ததுதான்.

அப்படி இல்லாமல், எட்டாம் வகுப்பு மாணவி ஒருத்தி, அற்புதமான கவிதைகளை எழுதுவதும் அவளது பெற்றோர் அவளின் கவி நெருப்பை அணைத்திடாது ஊதி வளர்ப்பதும், எட்டாம் வகுப்பிலேயே முதல் தொகுப்பை வெளியிடச் செய்வதும் ஆச்சர்யம் கலந்த ஆனந்தத்தைத் தருகிறது. ஆம் , கனல்மதி இப்போது ஒன்பதாம் வகுப்பில் இருக்கிறார், இவர் வெளியிட்ட இந்தத் தொகுப்பு சென்ற வருடம் இவர் எட்டாம் வகுப்பு மாணவியாக இருக்கும் போதே வெளியிடப்பட்டது. இது இன்ப அதிர்ச்சியாக உள்ளது. கவிஞர் கனல் மதியை உச்சி முகர்ந்து வாழ்த்துகிறேன்.
சிறுகை அழாவிய கூழ் எத்தனை தித்திப்பாக அமிழ்தமாக இருக்கும் என வள்ளுவன் சொல்லியிருக்கிறார். இச்சிறுகை அழாவித்தந்தது உண்மையிலேயே அமிழ்தம்தான். சின்னச்சின்ன கிறுக்கல்களல்லாமல், கவிதைக்கான அத்துனை அடிப்படைக் கூறுகளையும் கொண்டு எழுதப்பட்ட இந்தக்கவிதைகளை நாம் மனமார வரவேற்கலாம் என்று சொன்னேன்.

கவிஞர் கனல்மதியின் ஏற்புரையில் தான் சிறு வயதிலிருந்தே கவிதைகளில் ஈடுபாடு வந்து எழுத ஆரம்பிக்கையில் தனது பெற்றோர்களும் ஆசிரியர்களும் தான் தன்னை ஊக்கப்படுத்தி எழுத வைத்தனர் என்றார். தான் சிறப்பாக கவிதை எழுதுவதற்கும் எழுதிய கவிதைகளை வெளிப்படுத்தவும் இரண்டு முக்கியமான காரணிகள் உண்டு அவை தமது பெற்றோரும், தான் அரசுப்பள்ளியில் படிப்பதுமே காரணம் என்றார். தனியார் பள்ளிகள் மாணவர்களை மதிப்பெண் எந்திரங்களாகத்தான் உருவாக்குகின்றன. அரசுப்பள்ளிகள் தான் மாணவர்களின் திறமைகளுக்கான சுதந்திரத்தையும் வெளியையும் உருவாக்கித் தருகின்றன எனப் பேசினார். சின்ன உருவத்துக்குள் இத்தனை பக்குவமான பார்வையா என அனைவரும் வியந்தே போனோம்.

கவிஞர் செந்தில்பாலா எழுதிய மனிதர்களைக் கற்றுக் கொண்டு போகிறவன் கவிதைத் தொகுப்பை கவிஞர் அகிலா அறிமுகம் செய்து பேசினார். அகிலா அவர்கள் செந்தில்பாலாவின் கவிதைகளோடு கோட்டோவியங்களையும் அறிமுகப்படுத்தி பேசினார்.




இளைஞர்களின் எழுச்சி நாயகன் என்னும் தலைப்பில் மறைந்த முன்னாள் குடியரசுத் தலைவர் டாக்டர் அப்துல்கலாம் அவர்களின் நினைவேந்தல் உரையை புன்னகை ஜெயக்குமார் வழங்கினார்.

நிகழ்வில் கொலுசு என்ற இணைய இதழ் கவிஞர் அறவொளி அவர்களால் வெளியிடப்பட்டது.
நறுமுகை ஜெ.ராதாகிருஷ்ணன் அவரது சிறப்புரையில் .. நவீன கவிதை முகங்களையும், பதிப்பகங்களின் முகங்களையும் குறிப்பிட்டுப் பேசினார்.
வாசகர்கள் கவிஞர்கள் கலந்து கொண்ட கவியரங்கம் நடந்தது 20 கவிஞர்கள் கவிதைகளை வாசித்தனர்.
கவிஞர் அம்சப்ரியா அவர்களுடைய நன்றியுரையுடன் விழா இனிது முடிந்தது


செய்தி மடல் வெளியிடப்பட்டது. உங்கள் பார்வைக்கு

https://www.dropbox.com/s/8cv9g6ey5ex8kjt/PIV%20Seythimadal%2019.pdf?dl=0  

புதன், 19 ஆகஸ்ட், 2015

மிக முக்கியமான அறிவிப்பு : மிக்க மகிழ்ச்சியானதும் கூட ...


தமிழ்க் கவிதை உலகில் மிகமுக்கியமான சிற்றிதழாக பொள்ளாச்சி -ஆனைமலையிலிருந்து வெளிவந்து கொண்டிருந்த புன்னகை இதழ் 73 ஆவது இதழோடு பொருளாதார நெருக்கடி காரணமாக நின்று விட்டது. புன்னகையை மீண்டும் துவங்கச் சொல்லி நான் உட்பட நண்பர்களும் , எழுத்தாளர்களும், வாசகர்களும் கேட்டுக்கொண்டே இருந்தோம். பொருளாதார உதவியை நண்பர்கள் இணைந்து செய்வதாக முடிவானதும், விரைவில் 74ஆவது இதழைக் கொண்டு வருகிறோம்.

புன்னகையின் ஆசிரியர் குழு பின் வருமாறு.

ஆசிரியர் குழு :
செ.இரமேஷ்குமார்
க.அம்சப்ரியா
இணை ஆசிரியர் :
இரா.பூபாலன்
ஆலோசனைக்குழு :
சோலை மாயவன்
புன்னகை பூ ஜெயக்குமார்

ஆக வெகு விரைவில் தரமான நல்ல கவிதைகளுடன் புன்னகை கவிதை இதழ் மீண்டும் தனது பயணத்தைத் துவங்க உள்ளது என்பதை உற்சாகத்துடன் அறிவிக்கிறோம்.. புன்னகை தொடர்ந்து வெளிவர உதவுவோம்.
கவிஞர்களே விரைவில் தங்களது கவிதைகளை கீழ்க்கண்ட மின்னஞ்சலுக்கு அனுப்புங்கள் ..

punnagaikavidhai@gmail.com

மேலும் ஒரு இனிய செய்தி, 2013 ல் புன்னகை இலக்கிய விருது அறிவிக்கப்பட்டு கண்மணிராசா, நிலாரசிகன் ஆகியோருக்கு விருதுகள் வழங்கப்பட்டன. இதுவும் 2014ம் ஆண்டு வழங்கப்படவில்லை. பொள்ளாச்சி இலக்கிய வட்டத்துக்கு வரும் பல்வேறு படைப்பாளர்களும் தொடர்ந்து இது பற்றிக் கேட்டுக் கொண்டே இருந்தனர். இன்று அதுவும் முடிவு செய்யப்பட்டது. பொள்ளாச்சி இலக்கியவட்டம் மற்றும் புன்னகை இணைந்து வழங்கும் கவிதைகளுக்கான இலக்கிய விருது இந்த ஆண்டு முதல் வழங்கப்படும் என்பதையும் மிக்க மகிழ்ச்சியுடன் தெரிவித்துக்கொள்கிறோம் ..
இதற்கான முழுமையான அறிவிப்பு விரைவில் …

டொய்ங்....

செவ்வாய், 11 ஆகஸ்ட், 2015

கொலுசு இணைய இதழ்

வணக்கம் நண்பர்களே,

கொலுசு முதல் இதழ் வெளியாகிவிட்டது என்பதை மகிழ்வுடன் தெரிவித்துக் கொள்கிறேன். இணைய இதழாக மட்டுமல்லாது மின் இதழாகவும். 

கொலுசு இணையதளத்தைப் பார்வையிட, கீழ்க்காணும் சுட்டியில் நுழையுங்கள்


புதிய உறுப்பினர்கள் இங்கு தங்களது மின்னஞ்சலைப் பதிவுசெய்து கொண்டால், தங்களது மின்னஞ்சலுக்கு ஒரு சுட்டி வரும், அதைத் தொடர்ந்தால் போதும். பதிவாகிவிடும். பதிவுசெய்தால் மட்டுமே பின்னூட்டம் அளிக்க இயலும்.

படைப்புகள் அனுப்பி இருப்பவர்கள், தங்களது மின்னஞ்சல் ஏற்கெனவே பதிவாகிவிட்டதால், நுழை என்ற பகுதியில் சென்று
பயனர் பெயராக தங்கள் மின்னஞ்சல் முகவரியையும்
கடவுச்சொல்லாக password என்றும் தட்டினால் போதும்... நுழையலாம். 

நண்பர்கள் , இதழில் உள்ள படைப்புகளை வாசித்துவிட்டுப் பின்னூட்டமிடவும். தங்களது விமர்சனங்களைப் பதியவும்.

மேலும், ஆகஸ்ட் மாத இதழை மின்னிதழாக படவடிவக் ( PDF ) கோப்பாக பதிவிறக்கி, பின் வாசிக்க கீழ்க்காணும் சுட்டியைத் தட்டுங்கள்


இது மட்டுமல்லாது கைபேசியில் வாசிக்கவென ஒரு வடிவத்தில் அளிக்கிறோம், அதைத் தரவிறக்க


மின்புத்தகமாக ( E-Book ) தரவிறக்க


இதழை வாசித்துவிட்டு தங்களது மேலான கருத்துகளைப் பகிருங்கள்.

அடுத்த இதழுக்கான படைப்புகளை அனுப்ப kolusu.in@gmail.com என்ற மின்னஞ்சலுக்கு உடனடியாக படைப்புகளை அனுப்பி வையுங்கள்...



திங்கள், 3 ஆகஸ்ட், 2015

மை நேம் ஈஸ் இனியா ...

இன்று விடுமுறை திவ்யமா சாப்பிட்டுவிட்டு தொலைக்காட்சியைப் பார்த்துக் கொண்டு படுத்திருந்தேன் அனைவரும் வெளியில் அரட்டையிலிருந்தனர்.

இரண்டரை வயது இனியா பக்கம் வந்தாள். சும்மா பேசலாம் என்று வாட் ஈஸ் யுவர் நேம் என்றேன். பே என முழித்தாள். தெரியாது போல. சொல்லிக் குடுக்கலாம் என முடிவு செய்து. வாட் ஈஸ் யுவர் நேம் னு யார் கேட்டாலும் மை நேம் ஈஸ் இனியா என்று சொல்லனும் என்று சொல்லிக் கொடுத்தேன். ஒரு முறை சொன்னாள். மறுபடி கேட்டால் சொல்லத் தெரியவில்லை.

ஒழுங்கா கண்ண மூடி நாலு டைம் சொல்லு என்றேன்.

கண்ண மூடி
மை நேம் ஈஸ் இனியா
மை நேம் ஈஸ் இனியா
மை நேம் ஈஸ் இனியா
மை நேம் ஈஸ் இனியா என்றாள்.

மாமா , இப்ப கேளுங்க என்றாள். வாட் ஈஸ் யுவர் நேம் என்றால் சரியாக மை நேம் ஈஸ் இனியா என்று சரியாகச் சொன்னாள். இப்ப தான் நமக்கு ஆப்பு ஆரம்பமானது.

மாமா இப்ப நான் கேட்கிறேன். “ வாட் ஈஸ் யுவர் நேம் ?” என்றாள்
நானும் கெத்தாக " மை நேம் ஈஸ் பூபாலன் " என்றேன்.
" அய்யே தப்பு தப்பு, மை நேம் ஈஸ் இனியா  னு சொல்லனும்" என்றாளே பார்க்கலாம். சிரித்து விட்டேன். இல்ல டா நீ தான் அப்படி சொல்லனும் நான் அப்படி சொல்லக் கூடாது என்றால் விடவில்லை.

தப்பு தப்பு. நீங்க தப்பா சொல்றீங்க. ஒழுங்க கண்ண மூடி நாலு டைம் சொல்லுங்க என்றாள் பிடிவாதமாக. வேற வழி..? நானும் கண்களை மூடி

மை நேம் ஈஸ் இனியா
மை நேம் ஈஸ் இனியா
மை நேம் ஈஸ் இனியா
மை நேம் ஈஸ் இனியா

என்று சொன்னேன். இன்னும் சிரிப்பாகச்
சிரித்துக் கொண்டிருக்கும் வாயைத்தான்
மூட முடியவில்லை.